جمعه , جون 22 2018

هر څه بدلیږي !

واده

کوم انسان چې له عمر تیریدو سره بدل نشي نو پدې معنا ده چې په ژوند کې یې څه نه دي زده کړي او هماغسې ماشوم پاتې دی. بدبختي خو دلته ده چې ډیری خلک مو پدې فخر کوي چې نه دي بدل شوي. خو کومې ټولنې چې نه بدلیږي هغه یا په ماضي کې پاتې کیږي او یا هم ورکیږي. 

ځینې غصه دي چې په کابل کې یو هلک په عام میدان له یوې جینۍ څخه د واده غوښتنه کړې. په غربي ټولنه کې چې کله یو هلک او جینۍ یو بل ښه وپيژني نو څو میاشتې یا کاله وروسته هلک په همداسې عام محضر کې له جینۍ غواړي چې واده ورسره وکړي.

  • خو دلته پوښتنه دا ده چې افغانان ولې د غرب پیښې کوي؟
  • غربیان ولې زمونږ پيښې نه کوي؟ 

فکر کوم ځواب یې ټولو ته معلوم دی هغه دا چې زمونږ ډیری کلتوري عنعنات سلګونه کاله زاړه دي. زمونږ هلک او جینۍ ډیری وخت تر واده مخکې یو بل لا لیدلي هم نه وي. نوی نسل مو نه غواړي سلګونه کاله زاړه عنعنات په یویشتمه پیړۍ کې پلي کړي خو دا چې مونږ ورته نوی بدیل نلرو نو مجبور دي چې له هغوی یې کاپي کړي چې لري یې.

بل دا کار خو یې بد نه دی:

  • بد زمونږ هغه کلتور دی چې هلک او جینۍ په پټو سترګو یو بل کوي او بیا ټول عمر ورسره بند پاتې وي.
  • یا وړه ماشومه زوړ سړي ته ورکوي.
  • یا تعلیم یافته بې تعلیمه لوفر ته ورکوي.
  • یا خور د ورور د جرم په بدل کې قرباني کوي…

که ریښتیا مو هم مخالفت ته زړه کیږي نو د دغو شیانو مخالفت وکړئ. کنه دې هلک نه چاته تاوان رسولی او نه یې چاته بده خبره کړې. میئن یا عاشق تل غواړي چې په عام محضر کې د خپلې مینې اظهار وکړي.
بیا وایم کوم کلتور او مفکوره چې د وخت له تیریدو سره بدله نشي نو هغه یا له مینځه ځي او یا یې هم خلک شاته پاتې کیږي او د نورو محتاجیږي.

Check Also

زموږ لویه اختراع ډهول او چادري ده !

دا شل کاله مخکې روسانو د څلوېښتو ملیاردو ډالرو اته سوه الوتکي، شپږ زره چینه ټانګونه او ملیونونه میله وسله در پرېښوده، تاسې چې وسلې ته ناموس هم وایاست، هغه ټوله وسله مو ونه پلورله؟ په دې ټولو سربېره په پوزه مچ نه پرېږدئ، غټې غټې خبرې، لوی لوی نومونه.

2 څرګندونې

  1. زموږ د کلتور د لوټلو وېره سمه ده؟
    کله چې خپله ماشومه لور شپېته کلن بوډا ته واده کړو، فرشته غوندې پېغله پوډري ته ورکوو، پلار د کفالت په دعوه په لور اخستي لس لکه ولور ځان ته موټر رانيسي او د زوى د کړي قتل په بدل کې د کور دوه نجونې دوه شير خورو ماشومانو ته په بدۍ کې ورکړو يا د ورور کونډه په زور ځان ته نکاح کړو او برکټيان شپږ کلي لرې دکال په غله د خان مزدوران کړو، نو هله زموږ د کلتور غل بهرنى دى که موږ د خپل کلتور غله يوو؟
    داکلتور د يوې نجلۍ او هلک له خوا په علني نکاح نه پايمالېږي زموږ په هغو کړنو پايمالېږي چې ددين او دستور خلاف وي خو په مردسالارانه جراات يې تر سره کوو او نوم د رواج په کېږدو.
    زموږ کلتور خو هغه و، چې خپله مړۍ مو له ګاونډي سره وېشله، د عزيز په غم غمجنېدو، په پټي مو تارياک نه کرل، له قتل مو وېره کېده، د تورسرې په پړوني ساتلو کې مو خپل غرور ليده او په سړک مو ميندو ماشومانو ګدايي نه کوله.

  2. ستاسو د لیکنو څخه داسې ښکاري چې تاسو د مجید قرار د فکري بټۍ محصول يئ ، مجید قرار که بدلون په داسې ضد او نقیص نیوکو راوستلای وي نو ستاسو به هم يو بدلون راولي خو فکر کوم چې له سم بدلون څخه به يې ناوړه منفي بدلون ډېر شي . انسان بې له شکه چې بدلون کې دی که یې مني يا که نه خو زموږ د افغانانو يوه ستونزه چې ده هغه داده چې موږ د بدلون په معنوي او حقیقي اړخ نه پوهېږو بلکې د خپل د ذوق او شوق پخاطر چې باید ترسره شي په هرحالت کې د نورو سره سيالي کوو په دې نه پوهېږو چې بېړۍ مو غرقېږي خو باید چې سیند ته ورګډ شو . زما په اند تر څو چې لامبو زده نه کړو له سینده به ډنډونه ښه وي چې لامبو زده کړو . بله خبره دا ده ستاسو په لیکنو چې نیوکه راجګېدای شي هغه داده چې ستاسو بېلګې سمې ندي . چېرته په بدو کې ورکول چې غیر اسلامي عمل دی ، چېرته بیا ستاسو دغه عمل چې کاپي شوای ؟ دغه عمل د افغان لپاره بيا د يو مسلمان لپاره ځکه عجیب عمل ښکاري چې واده پخپله د ارزښت وړ عمل دی او دا عمل په ژوند کې د پوخ معيار ذمانت باید له ځان سره ولري چې د اسلامي اصولو سره په ټکر کې نه وي . نن دغه ځوان دغسې کاپي وکړله سبا په هماغه ځای کېدای شي غیر معياري دود کاپي کړي او نجلۍ ته په بېړه طلاق ورکړي بیا به ورته څه وايئ ؟ زه فکر کوم د افغانستان وګړي دې د ښځې د سپېڅلي نوم د ارزښت ساتنې تقلید د اسلام د سپېڅلي دین د حکم سره سم وکړي نه دا چې د نمايشي بازارتېزيو تقلید . اسلام کې دننه با ارزښته حقوق ښځې ته ټاکل شوي چې افغانان يې ورته نشي وربرابرولای او ټولنه ورځ تر بلې فساد ته منډې وهي ځکه چې د ښځې د سالمې روزنې لپاره په يووالي سره شرايط نه جوړو خو د ښځې د شتون څخه په نمایشي پېښو کې تر ټولو لومړی کار اخلو . د افغانانو د شعوري پوهې او ويښېدو په هیله .

تبصره وليکئ